【物理治療Physiotherapy | Bachelor Degree學士課程到底讀d咩？學習內容及範疇分享】
好多學生都希望讀物理治療，畢業後成為物理治療師；但對於大學Bachelor Degree物理治療課程內容，學習範疇，實際學習內容，到底大家又認識幾多呢？
物理治療課程到底讀d咩？物理治療課程知多啲
物理治療課程主要由三大部組成，雖然每間大學所訂立嘅課程並不一樣，但不外乎都係包括一般理論課程（Theory Lectures）、實際應用課程（Practical Classes）同埋實習（Placements）。
一般理論課程（Theory Lectures）
一般理論課程（Theory Lectures）就好似平時嘅課堂咁，喺Lecture Hall入面由教授或講師授課，內容主要喺生理學（Physiology）、病理學（Pathology）、人體解剖學（Human Anatomy）等喱啲理論性課堂，亦有可能係一名現職物理治療師黎作客席講師傳授或分享物理治療相關嘅知識。理論課程大多數為大班教學，即係全級一齊上同一個Lecture。每個課程通常一個星期會有一節理論課程，每節大約為一個至一個半小時。
評分方法就會有分為考試形式嘅試卷或者以寫論文形式嘅功課。
實際應用課程（Practical Classes）
而實際應用課程（Practical Classes）就係將理論課程入面學到嘅知識應用喺物理治療師日常嘅工作上。實際應用課程多數都係會以小班教學嘅形式進行，例如一級70人嘅物理治療課程會分為3-4個小班，上堂時就會再分2-3個人為一個小組，上堂地點亦都會係模擬醫院病房嘅實習教室（Practical Room）。實際應用課程內容大多為理論課程嘅補充或實踐內容，大部份時間都係2人一組，一人扮演病人而另一人扮演治療師，將理論課堂上面學到嘅觸診方法（Palpation）或治療方法（Treatment）應用番喺同學身上。實際應用課程大多一個星期會有一至兩節，每節大約為一個半小時至兩小時。
考試多數會以模擬個案形式進行，即一名同學扮演病人，學生就需要對個案中嘅病人作出診斷同埋安排治療療程，之後再向考官解釋原因及背後原理。
實習（Placements）
實習（Placements）就係真真正正喺醫院入面工作嘅過程。根據每間大學所訂立嘅課程日程不同，學生實習嘅日期同時數都會有所不同，有一啲大學會係Year 1就安排實習（Observational Placement）俾學生，希望學生可以喺醫院入面透過觀察物理治療師嘅日常工作黎學習；有一啲大學會喺Year 2先安排實習俾學生，希望學生可以有足夠嘅知識之下，先係醫院入面幫助物理治療師完成初步診斷嘅工作。實習時所隸屬既部門亦根據大學所安排而有所不同，大學會安排學生係不同部門內實習以獲取不同經驗及機會去探討自己嘅興趣，學生喺課程內會完成1000小時或以上嘅實習時數，所以修畢外國大學物理治療課程嘅學生，回港後都符合物理治療工會所訂立至少需要800小時實習課嘅要求
資訊只作參考，以個別院校最新公布消息為準，學生及家長報讀前要密切留意相關院校公布的細節。