英國最普遍又最受歡迎嘅早餐，點講一定係英式早餐。

佢嘅普遍程度係幾乎每一間cafe，English Breakfast都總係餐牌上第一個選擇。英式早餐嘅配搭仲好豐盛添，即使是最普通嘅英式早餐，亦至少總會有五種配菜：煙肉、香腸、雞蛋、茄汁豆同多士。

香港茶記嘅早餐，火腿煎雙蛋係基本嘢；去到英式早餐，就會食煙肉同香腸；雞蛋雖然有好多唔同嘅煮法，但配襯英式早餐就總係食煎蛋；仲有”國民食品” 嘅茄汁豆；最後就係多士喇。若果未夠飽，仲可以追加其他配菜，好似煎蘑菇、焗番茄同薯餅等等。

有時候食成個英式早餐的確份量太多，加上都市人通常都無咩時間日日整個Full English Breakfast，所以慢慢就變成週未食Brunch嘅常客。再者佢係英國comfort food嘅代表，無論係午餐、晚餐甚至宵夜，你都可以搵到一間賣緊英式早餐，所以又會被叫做All-Day Breakfast，即係常餐喇！